भवन निर्माणको पैसा  प्रधानाध्यापकले नै किर्ते गरेर निकाले

रौतहट : नगरपालिकाको नक्कली लेटरप्याड, दस्तखत छाप किर्ते गरी यहाँको एक विद्यालयका प्रधानाध्यापकले राष्ट्रिय वाणिज्य बैंकबाट भवन निर्माणको रकम निकालेको खुलेको छ ।

चन्द्रपुर नगरपालिकाले रोक्का राखेको रकम प्रधानाध्यापकले नक्कली फुकुवा पत्र बनाई निकालेका हुन् । रकम झिकेको विषयमा छानबिन र कारबाही प्रक्रियाका लागि नगरपालिकाले सोमबार इलाका प्रहरी कार्यालय चन्द्रनिगाहपुरलाई पत्राचार गरेको छ ।

चन्द्रपुर–५ राजपैडास्थित श्री आधारभूत विद्यालयको चार कोठे भवन निर्माणका लागि जम्मा गरिएको रकममध्ये प्रधानाध्यापक किशोरी चौधरीले २० लाख रुपैयाँ नगरपालिकाको नक्कली लेटरप्याड, छाप, चलानी नम्बर र किर्ते हस्ताक्षर गरी अपचलन गरेको खुलेको छ ।

चार कोठे विद्यालय भवन निर्माणका लागि राष्ट्रिय योजना आयोगले विशेष अनुदानको रूपमा नगरपालिकालाई ५० लाख रुपैयाँ निकासा दिएको थियो । भवन निर्माणको कामको भुक्तानी विद्यालयबाट हुने गरी नगरपालिकाले व्यवस्था मिलाएको थियो ।

प्रधानाध्यापकले रकम हिनामिना गर्ने आशंकामा नगरपालिकाका तत्कालीन प्रमुख प्रशासकीय अधिकृत हरिलाल पुरीले बैंकलाई पत्र पठाई सबै रकम रोक्का राखेका थिए । उक्त भवन निर्माणको ठेक्का चन्द्रपुर–१ स्थित ब्रह्मबाबा कन्स्ट्रक्सनले लिएको थियो ।

कन्स्ट्रक्सनले ०८० असार २० गते सम्झौता गरी निर्माण कार्य सुरु गरेको थियो । ठेकेदारले काम गरे अनुसार २०८० पुस ११ गते पहिलो किस्ताको २० लाख १० हजार ५ सय २९ रुपैयाँ र दोस्रो किस्ताको १० लाखका लागि नगरपालिकाले बैंकमा रकम फुकुवा गर्न लगाएपछि विद्यालयले भुक्तानी दिएको थियो ।

भवन निर्माणको काम गत असार १५ गते सम्पन्न भइसके पनि अन्तिम किस्ता तथा सम्झौता अनुसारको बाँकी रकम प्रधानाध्यापक चौधरीले भुक्तानी दिन आनाकानी गरेको ठेकेदार विनोद कार्कीले बताए । ‘काम सम्पन्न भइसक्दा पनि चौधरीले रकम निकासा गर्न मानेनन्,’ उनले भने, ‘पटक/पटक ताकेता गर्दा सुनुवाइ नभएपछि नगरपालिकालाई गुहारेका हौं । भुक्तानी नहुँदा मारमा परेका छौं ।’

ठेकेदारले भुक्तानी नपाएको गुनासो गरेपछि नगरपालिकाका शिक्षा अधिकारी दीपेन्द्र मण्डलले प्रधानाध्यापक चौधरीसित समन्वय गरेका थिए । तर उनले भुक्तानी दिन आलटाल गर्दै आएको अधिकारी मण्डलले बताए । भवन निर्माणको रकम निर्माण व्यवसायीलाई भुक्तानी गर्नुको बदला प्रधानाध्यापक चौधरीले ०८० पुस १८ गते २० लाख निकालेर निजी प्रयोजनमा खर्च गरेको पाइएको छ ।

निर्माण कार्यको रनिङ बिलको रकम दुई पटक भुक्तानी गर्दा कट्टा भएको मूल्य अभिवृद्धिकर ३ लाख ३८ हजार ४ सय ७३ रुपैयाँसमेत आन्तरिक राजस्व कार्यालयमा जम्मा नगरी अपचलन गरेको नगरपालिकाले जनाएको छ । विद्यालयको खाता नम्बर १९७७१०००००२६८००१ मा रहेको २० लाख रुपैयाँ प्रधानाध्यापक चौधरीले प्राविधिक जाँच, बिलभर्पाईबिना नै निकालेर हिनामिना गरेको प्रमुख प्रशासकीय अधिकृत किरणनिधि तिवारीले बताए ।

‘हामीले छानबिन र कारबाहीका लागि इलाका प्रहरीलाई अनुरोध गरेका छौं,’ उनले भने, ‘प्रहरीले नक्कली लेटरप्याड, छाप, किर्ते हस्ताक्षरबारेमा अनुसन्धान गरेपछि थप वास्तविकता खुल्नेछ ।’

चौधरीले बैंकमा फुकुवाका लागि पेस गरेको लेटरप्याड र चलानी नम्बर नक्कली भएको नगरपालिकाको आन्तरिक छानबिनका क्रममा फेला पारेको छ । नगरपालिकाले भुक्तानीका लागि पहल गर्दा चौधरीले अटेर गरेपछि बैंक स्टेटमेन्ट निकालेको थियो । त्यसपछि प्रधानाध्यापकले पेस गरेको फुकुवापत्र बैंकबाट मगाइएको थियो ।

नगरपालिकाले आन्तरिक रूपमा छानबिन गरेपछि नक्कली लेटरप्याड, किर्ते हस्ताक्षर, नक्कली चलानी नम्बर फेला पारेपछि प्रहरीलाई छानबिन र कारबाहीको लागि पत्र पठाएको हो । प्रधानाध्यापक चौधरीले नगरपालिकाले नै फुकुवा गरेपछि आफूले रकम निकालेको दाबी गरेका छन् ।

‘मैले कुनै किर्ते काम गरेको छैन । नगरपालिकाले नै फुकुवा गरेको हो,’ उनले भने, ‘रकम हिनामिना गरेको छैन । कुनै किर्ते काम भएको छैन ।’ तत्कालीन प्रमुख प्रशासकीय अधिकृत पुरीले आफूले रोक्का राखेको विद्यालयको रकम सम्बन्धमा फुकुवा भए/नभएको कुनै जानकारी नभएको बताए ।

‘मलाई फुकुवा गरेको जस्तो लाग्दैन,’ उनले भने, ‘यस सम्बन्धमा छानबिनपछि पत्ता लाग्छ होला ।’ प्रमुख प्रशासकीय अधिकृत पुरी चन्द्रपुरबाट सरुवा भई अहिले वाग्मती नगरपालिकामा गएका छन् । कान्तिपुरमा प्रकाशित समाचार