विज्ञान विषयको सिकाइ अभिवृद्धि गराउन रामेछापमा विज्ञान शैक्षिक सामग्री प्रदर्शनी सम्पन्न

मंसिर २, रामेछाप । रामेछापको मन्थलीमा विज्ञान शैक्षिक सामग्री प्रदर्शनी कार्यक्रम सम्पन्न भएको छ।

मन्थली नगरपालिका शिक्षा, युवा तथा खेलकुद शाखाको आयोजनामा मन्थली माध्यमिक विद्यालयको प्राङ्गणमा सम्पन्न भएको थियो । विज्ञान शैक्षिक सामग्री प्रदर्शनी  कार्यक्रममा मन्थली नगरपालिका भित्र सञ्चालनमा रहेका कुल २० वटा सामुदायिक र संस्थागत विद्यालयमा मध्ये १९ वटा विद्यालयहरूले सहभागिता जनाएका थिए ।
कार्यक्रममा सहभागी विद्यालयहरू मध्येबाट प्रथम, द्वितीय, तृतीय र सान्त्वना क्रमश : मन्थली माध्यमिक विद्यालय, लिटिलस्टार ई. स्कुल, तामाकोशी ई.स्कुल र भिमेश्वर रुद्र माध्यमिक विद्यालय भएका थिए । विजयी विद्यालयहरूलाई नगद पुरस्कार र प्रमाणपत्र प्रदान गरिएको थियो।

बालबालिकाको अन्तरनिहित प्रतिभा प्रस्फुटन गराउन तथा विज्ञान विषयको सिकाइ उपलब्धी अभिवृद्धि गराउने उदेश्यले नगरपालिकाले आफ्नो वार्षिक नीति तथा कार्यक्रममा बजेट व्यवस्थापन गरि अतिरिक्त क्रियाकलापहरू सञ्चालन गर्दै आएको छ । जिल्लाको सदरमुकाम अवस्थित रहेको र मन्थली नगरपालिकाको कुल विद्यार्थीको ४० प्रतिशत विद्यार्थी मन्थली बजारमा अध्ययनरत रहेको कारण करिब ९०० विद्यार्थीले सो विज्ञान प्रदर्शनी अवलोकन गरेका थिए । सदरमुकाममा कार्यक्रम गर्दा टाढाका विद्यालहरूलाई विभिन्न कुराले बाधा पर्न जाने हुँदा कार्यक्रममा केही प्राविधिक कठिनाइ भएको साथै आगामी दिनमा यस्ता समस्याहरुलाई समाधान गर्दै विद्यार्थीहरुको प्रतिभा प्रस्फुटनमा विशेष योजना बनाइने जानकारी शिक्षा,युवा तथा खेलकुद शाखा प्रमुख विष्णु अधिकारीले जानकारी दिए।

नगरपालिकाले यस अघि गणित शैक्षिक सामग्री प्रदर्शनी समेत आयोजना गरेको थियो । आगमी दिनमा हाजिरिजवाफ र वक्तृत्वकला कार्यक्रम समेत गरिने जानकारी शाखा प्रमुखले दिएका छन।

मन्थली माध्यमिक विद्यालयको विद्यालय व्यवस्थापन समिति अध्यक्ष तेजप्रसाद सुवेदीको अध्यक्षता, मन्थली नगरपालिकाका उपप्रमुख इश्वरी बस्नेत, प्रमुख प्रशासकीय अधिकृत देवर्षि सापकोटा, महाशाखा प्रमुख हेमन्तकुमार बुढाथोकी, सामाजिक विकास समितिका संयोजक गोपाल श्रेष्ठ शिक्षा विकास तथा समन्वय इकाइका प्रमुख नेत्र प्रसाद गजुरेल तथा वडा नं ३ का वडा अध्यक्ष कृष्णगोपाल थापाको विशेष आतिथ्यतामा कार्यक्रम सम्पन्न भएको थियो ।