एसईईको सम्पुर्ण तयारी पूरा, परिक्षा चैत ७ बाट सुरु, नतिजा असार ७ मा प्रकाशन हुने

काठमाडौं – राष्ट्रिय परीक्षा बोर्डका परीक्षा नियन्त्रक नन्दलाल पौडेलका अनुसार २०८१ सालको माध्यमिक शिक्षा परीक्षा (एसईई) चैत ७ गतेदेखि सुरु हुने भएको छ। परीक्षा सञ्चालनका लागि आवश्यक सम्पूर्ण तयारी पूरा भइसकेको जानकारी गराइएको छ।

यस वर्ष देशभरका २,०८० परीक्षा केन्द्र मार्फत ५,१४,०७१ परीक्षार्थी सहभागी हुनेछन्। तीमध्ये सबैभन्दा बढी ३९,६०० परीक्षार्थी काठमाडौंबाट, जबकि सबैभन्दा कम ४३ जना परीक्षार्थी मनाङबाट परीक्षा दिनेछन्। यसबाहेक, जापानमा पनि एक परीक्षा केन्द्र तोकिएको छ, जहाँ २९ जना परीक्षार्थी सहभागी हुनेछन्।

परीक्षा व्यवस्थापनका लागि ७७,८०० कर्मचारी परिचालित गरिनेछ, जसमा ३०,००० सुरक्षाकर्मी रहनेछन्। साथै, केन्द्रीय कारागार सुनधारा र दैलेख कारागारमा समेत परीक्षा केन्द्र व्यवस्था गरिएको छ।

राष्ट्रिय परीक्षा बोर्डका अनुसार २०८२ असार ७ गते एसईई परीक्षाको नतिजा सार्वजनिक गरिनेछ। शिक्षामन्त्री विद्या भट्टाराईले परीक्षार्थीहरूलाई सफलताका लागि शुभकामना व्यक्त गर्दै अनुशासन र आत्मविश्वासका साथ परीक्षा दिन आग्रह गरेकी छन्।