शैलुङको बजेट शिक्षामा प्राथमिकता , सुत्केरी विदामा सट्टा शिक्षक राखिने

शिक्षापाटी

बिदुर कार्की, दोलखा । दोलखाको शैलुङ गाउँपालिकाले आगामी आर्थिक वर्ष २०८२/८३ का लागि शिक्षा क्षेत्रलाई उच्च प्राथमिकतामा राख्दै २ करोड ५४ लाख ८० हजार रुपैयाँको बजेट विनियोजन गरेको छ। गाउँपालिकाले सार्वजनिक गरेको बजेटमा शिक्षक-कर्मचारीको तलबभत्ता, विद्यार्थीका लागि दिवा खाजा र शिक्षकहरूको पेसागत विकासलाई मुख्य प्राथमिकतामा राखेको स्पष्ट देखिन्छ।

सुत्केरी विदामा सट्टा शिक्षक राखिने 

महिला शिक्षकले सुत्केरी अघि र पछी गरि ९८ दिन सुत्केरी विदा पाउने कानुनी व्यवस्था छ । शिक्षक लामो समय सुत्केरी विदामा बस्दा विद्यार्थीको सिकाइमा प्रत्क्ष्य मार पर्ने भएकोले तेस्तो हुन नदिन  सट्टा शिक्षक राख्ने प्रस्ताव बजेटमा छ । यसको लागि पालिकाले रु २ लाख ५० हजार विनियोजन गरेको छ ।

शिक्षक व्यवस्थापन र प्रोत्साहनमा सर्वाधिक लगानी

कुल बजेटको सबैभन्दा ठूलो हिस्सा, अर्थात् ७४ लाख रुपैयाँ, ‘बाल शिक्षक कर्मचारी तथा शिक्षक थप तलब’ शीर्षकमा विनियोजन गरिएको छ। यसले गाउँपालिका शिक्षण पेसालाई मर्यादित र आकर्षित बनाउन तथा विद्यालयमा शिक्षकको अभाव हुन नदिन प्रतिबद्ध रहेको संकेत गर्दछ। यसका साथै, शिक्षक तालिमका लागि १० लाख, कार्यसम्पादनमा आधारित प्रोत्साहनका लागि ५ लाख, र उत्कृष्ट शिक्षक-विद्यार्थी पुरस्कारका लागि ६ लाख रुपैयाँ छुट्याइनुले शिक्षकको क्षमता विकास र उत्प्रेरणामा गाउँपालिकाको ध्यान केन्द्रित रहेको देखाउँछ।

विद्यार्थी आकर्षण र स्वास्थ्यमा जोड: दिवा खाजा कार्यक्रमको विस्तार

विद्यार्थीलाई विद्यालयमा टिकाइराख्न र उनीहरूको पोषण अवस्थामा सुधार ल्याउन महत्वपूर्ण मानिएको दिवा खाजा कार्यक्रमलाई गाउँपालिकाले विशेष जोड दिएको छ। कक्षा १ देखि ५ का लागि ९ लाख ८० हजार र कक्षा ६ देखि ८ का लागि २३ लाख रुपैयाँ गरी कूल ३२ लाख ८० हजार रुपैयाँ दिवा खाजाका लागि मात्रै विनियोजन भएको छ। आधारभूत तहको अन्त्यसम्मै दिवा खाजा कार्यक्रम विस्तार गर्नुलाई शैक्षिक सुधारको एक महत्वपूर्ण र सकारात्मक कदमका रूपमा विश्लेषण गरिएको छ।

शैलुङको सुन्दर काटाकुटी गाउँ

पढाइबाहेकका क्रियाकलाप र शैक्षिक गुणस्तरमा पनि ध्यान

गाउँपालिकाले विद्यार्थीको चौतर्फी विकासका लागि अतिरिक्त क्रियाकलापमा पनि उल्लेख्य बजेट छुट्याएको छ। ‘राष्ट्रपति रनिङशिल्ड प्रतियोगिता सञ्चालन लगायत अन्य खेलकुद’ का लागि ३५ लाख रुपैयाँ विनियोजन गरिएको छ, जुन तलबपछिको दोस्रो ठूलो बजेट हो। यसले शैक्षिक गुणस्तरका साथै विद्यार्थीको शारीरिक र मानसिक स्वास्थ्यमा पनि गाउँपालिकाले उत्तिकै जोड दिएको प्रस्ट पार्छ।
त्यसैगरी, परीक्षा सञ्चालनलाई व्यवस्थित गर्न २० लाख, विद्यालय अनुदान कार्यक्रमका लागि १६ लाख, र शैक्षिक अवलोकन भ्रमणका लागि ५ लाख रुपैयाँको बजेटले शैक्षिक गुणस्तर र प्रशासनिक चुस्तता बढाउन मद्दत पुग्ने देखिन्छ।

समग्र विश्लेषण
शैलुङ गाउँपालिकाले आव २०८२/८३ का लागि विनियोजन गरेको शिक्षा बजेटले शिक्षक, विद्यार्थी र विद्यालय प्रशासन गरी शिक्षाका तीनवटै मुख्य स्तम्भलाई सन्तुलित रूपमा समेट्ने प्रयास गरेको छ। शिक्षकको वृत्ति विकास र सुविधा, विद्यार्थीको स्वास्थ्य र विद्यालयमा नियमितता, र समग्र शैक्षिक गुणस्तर अभिवृद्धिमा केन्द्रित यो बजेटको सफल कार्यान्वयन हुन सकेमा गाउँपालिकाको सार्वजनिक शिक्षाले सकारात्मक फड्को मार्ने अपेक्षा गर्न सकिन्छ।

पालिकाले शिक्षामा विनियोजन गरेको बजेट विवरण